Имплант хийлгэсний дараа юуг анхаарах вэ?

Шүдний имплант нь шүдний имплант нь авагдсан эсвэл ургаагүй шүд байхгүй орон зайг нөхөн сэргээх хамгийн найдвартай орчин үеийн шийдлийн нэг бөгөөд зөв арчилгаа, зөв дадалтай байвал олон жилийн турш төрөлхийн шүд шиг үйлчилдэг. Гэхдээ имплант хийлгэсний дараах эхний хоногууд болон эдгэрэлтийн бүх хугацаанд өвчтөн өөрөө маш анхааралтай байх нь эмчилгээний амжилтад шууд нөлөөлдөг.

Олон хүн имплант хийлгэсний дараа юуг анхаарах вэ гэж асуудаг. Үнэндээ имплант эмчилгээний амжилтын нэг хэсэг нь эмчийн хийсэн мэс ажилбар, нөгөө хэсэг нь таны өдөр тутмын дадлаас шалтгаалдаг. Доорх зөвлөмжийг мөрдвөл имплант илүү хурдан, аюулгүй, урт хугацаанд бат бөх тогтдог.

1. Эхний 24 цаг – хамгийн эмзэг үе

Имплант тавьсан эхний 24 цагт шарх хамгийн эмзэг байдаг. Энэ үед:

шархны хэсгийг хэлээрээ оролдох, гараараа хүрэхээс зайлсхийх
амаа хүчтэй зайлахгүй, шүлсээ хэт сорж залгихгүй байх
соруул ашиглах, тамхи татах зэрэг соруулах хөдөлгөөн хийхгүй байх
эмчийн өгсөн марлийг зааврын дагуу хазаж, цус тогтоох

Бага зэрэг цус шүүрэх нь хэвийн. Харин цус зогсохгүй олон цагаар үргэлжилбэл өөрөө эм уухын оронд эмчдээ яаралтай хандах хэрэгтэй.

2. Имплант хийлгэсний дараа өвдөлт хэвийн үү?

Имплантын дараах бага зэрэг өвдөлт, хавдар, нүүр таталдах мэт мэдрэмж нь хэвийн үзэгдэл. Ихэвчлэн 2–3 хоногийн дотор багасч, 7 хоногийн дотор бараг алга болдог. Өвдөлтийг багасгахын тулд:

нүүрний гадаад талаас 10–15 минут хүйтэн жин тавьж, 10 минут амраах. Хүйтэн жинг зөвхөн имплант хийлгэсэн эхний өдрөө л тавина,
хэвтэхдээ толгойгоо арай өндөрлөж унтах
эмчийн бичиж өгсөн өвчин намдаагч, үрэвслийн эмийг цагийн дагуу уух

Халуурах, хүчтэй өвдөлттэй байх, хавдар өдөр өнгөрөх тусам нэмэгдэх зэрэг шинж илэрвэл эмчид даруй хандаарай.

3. Имплант хийлгэсний дараа хоол хүнсээ хэрхэн сонгох вэ?

Имплант хийлгэсний дараах хэдэн хоногт хатуу хоол идэх нь шархны хэсэгт ачаалал өгч, эдгэрэлтийг удаашруулдаг. Иймээс:

Зайлсхийх хоол:

хатуу мах, яс, самар, хатаасан талх
хэт халуун хоол, халуун ундаа
наалдамхай чихэр, бохь
хийжүүлсэн ундаа, архи

Зөвлөх хоол:

зутан шөл, нухаштай хоол
тараг, йогурт, зөөлөн бяслаг
нухсан төмс, агшаасан ногоо
зөөлөн чанасан өндөг

Хоолоо зажлахдаа имплант тавиулсан талаараа бус нөгөө талын шүдээ ашиглан идэх нь илүү аюулгүй. Хэт халуун, хэт хүйтэн хоолыг шууд хэрэглэхээс түр хугацаанд зайлсхийх нь зөв.

4. Амны хөндийн ариун цэвэр

Имплант нь өөрийн эрүү, хоншоорын ястай холбогдох (оссеоинтеграци) процессийг үр дүнд илүү нягт, бат бөх бэхлэгдэж тогтдог. Энэ үед амны хөндийн ариун цэвэр хангалгүй байвал үрэвсэл үүсэх нөхцөл бүрдэж имплантын үр дүнд сөргөөр нөлөөлнө.

эхний 24 цаг шүдээ угаахдаа шархны эргэн тойронд сойзыг хүргэхээс зайлсхийх
эмчийн зөвлөсөн ариутгалын уусмалаар амаа зөөлөн зайлах
тамхи татахгүй байх, эсвэл ядаж хэдэн долоо хоног завсарлах

Архи, тамхи хэрэглэх нь захын судсыг агшааж, цусны эргэлтийг удаашруулснаар имплантын эргэн тойронд ирэх цусан хангамж буурч эдгэрэлтийн явцыг удаашруулдаг тул имплантын амжилтыг мэдэгдэхүйц бууруулдаг гэдгийг санаарай.

5. Биеийн хүчний ачааллыг багасгах

Имплант хийлгэсний дараах хэдэн хоног биеийн хэт их ачаалал шарханд даралт үүсгэж, цус хурах, хавдар нэмэгдэх шалтгаан болдог. Тиймээс:

гүйх, үсрэх гэх мэт идэвхитэй дасгал хөдөлгөөнөөс 5–7 хоног татгалзах
саун, халуун рашаанд орохгүй байх
хөлс их гаргах дасгалыг хэсэг хугацаанд багасгах

Хөнгөн алхалт, энгийн хөдөлгөөн нь цусны эргэлтэд эерэг нөлөөтэй тул боломжийн түвшинд хийхэд зүгээр.

6. Эмчид тогтмол хянуулж байх

Имплант нь тавиулчихаад орхидог нэг удаагийн эмчилгээ биш. Тогтмол хяналт, цаашдын арчилгаа зайлшгүй шаарддаг. Товлосон хугацаандаа үзлэгт ирснээр:

шархны эдгэрэлтийн явцыг үнэлэх
ястай хэрхэн холбогдож байгааг хянах
үрэвсэл, халдвар, буруу ачааллын эрсдэлийг эрт илрүүлэх

Хэрэв имплант ганхаж байгаа мэт санагдах, шөнө өвдөх, буйл улайж хавдах, идээ гарах шинж илэрвэл товлосон хугацаагаа хүлээлгүй яаралтай үзлэгт орох нь хамгийн зөв.

Имплантын дараах урт хугацааны арчилгаанд тогтмол шүдний эмчдээ хандах, жилд дор хаяж нэг удаа ерөнхий үзлэгт орох, Prodent dental clinic шүдний эмнэлэг -н мэргэжлийн туршлагатай эмч нарт хандахыг зөвлөж байна.

Дүгнэлт

Имплант хийлгэсний дараа юуг анхаарах вэ гэдэг асуултад хамгийн товч хариу өгөхөд: эмчийн зааврыг ягштал дагах, амны хөндийн ариун цэврийг сайн сахих, хооллолт болон амьдралын хэв маягаа түр хугацаанд өөрчлөх шаардлагатай. Ингэснээр:

эдгэрэлт хурдан, хүндрэл багатай явагдана
имплант олон жил бат бөх байна
зажлах үйл ажиллагаа, инээмсэглэл, өөртөө итгэх итгэл сайжирна

Эргэлзээтэй зүйл гарсан тохиолдолд интернэтээс бус, өөрийн шүдний эмчээсээ шууд асууж зөвлөгөө авах нь хамгийн найдвартай сонголт. Илүү дэлгэрэнгүй мэдээллийг олон улсын байгууллагын гаргасан баримт бичиг, жишээ нь ДЭМБ-ын амны хөндийн эрүүл мэндийн зөвлөмж-ээс мөн уншиж болно.